@ potter @
المدير العام
 عدد الرسائل : 324
العمر : 40
تاريخ التسجيل : 23/10/2007
 |  موضوع: فــلســـفة حمـــامــــه  الثلاثاء مارس 25, 2008 5:04 am | |
|  فلسفة حمامه أعجبتني الصورة .. واختلطت مشاعري .. ما بين ضحكه على طفلة .. وما بين هيبة الحرم ..والشوق إليه ... وما بين جمال المنظر
تخيلت نفسي جالسه في الساحه استريح من الدنيا .. وبجانبي مرت حمامه
وقفت
تنظر إلي
تنتظر إني أعطيها أكل
مديت لها يدي .. أعطيها حب .. انثره لها هنا وهناك ... لين تعودت علي .. و قررت تقترب أكثر
*
*
*
ودي اكلمها ... ودي اسألها .. بعدين تبسمت على الخيالات إلي عايشه فيها
قلت آه من التعب بصوت عالي .. إلا وردت علي
سلامتك يا ترنيمة من الآه
سبحان الله ... حمامه تتكلم ... وكمان تعرفني
قالت إيه .. كم مرة أكلتيني ... ونثرتى لي الحبوب بيديك
سألتها ... وكيف تذكريني من بين ملايين البشر ؟
إحنا ياترنيمة ماهو مثل بعضكم .. إحنا ما ننسى الجميل .. ولا ننكر المعروف .. ونحفظ ديننا أحسن منكم
انتى احسن مننا ؟؟؟
طبعا .. نسبح الله بكرة وأصيلا .. ويكفي يوم كان نبيك صلى الله عليه وسلم في الغار .. حميناه .. وجلسنا على الغار .. ووضعنا البيض وفديناه .. لكن انتم ... ايش سويتم ؟؟؟
بضائع الدنمارك تملأ بيوتكم والله المستعان
وربك ... لو جتنا حبوب من الدنمارك لنتركها .. حتى لو متنا من الجوع
رحت سألتها لاجل أتجنب الإحراج .. ياحمامه كيف حالك ؟
بخير يا ترنيمة حب
كيف الدنيا معاك .. مبسوطه .. والا متضايقه .. مرتاحه .. والا تعبانه ؟؟؟
عجيب أمرك ترنيمه حب .. وهل هناك أحد من خلق الله ماهو قانع بما قسم الله له و ماهو مبسوط ؟؟؟
كثير والله يا حمامه
الحمدلله الذي عافانا مما ابتلاكم
الدنيا كلها تعب .. جري وراء الرزق وجري وراء العمل والمظاهر ... وكأننا حانعيش على طول
باعلمك شئ يا ترنيمة حب.. ولا تقولى [فلسفة من حمامه )
هاتى ما عندك يا حمامه .. ولو كانت فلسفة مو مشكله .. الكل صار يتفلسف اليوم .. كل واحد والا وحده أصبح خبير .. كل واحد اصبح مفتي وعالم وإداري كبير .. وهو مفتاح اصلاح كل الأمور .. ماجات عليك
سمعيني .. علميني .. يمكن منك استفيد
شفتى هذى الساحه .. ملياااااانه حبوب .. ما آخذ إلا كفايتي .. بس إللي يشبعني .. ماني مثلكم
ولا فينا وحده مثلكم
كلنا جماعه وحده .. نأكل سوا .. نطير سوا .. ما تفرقنا مثل بعض المسلمين
نجمع ... نحسد ... نحقد
طيب أجمع لمين .. لنفسي ... طيب طالما انا شبعت .. أيش رايحه استفيد .. ليه ما اترك الباقي لحمام الحرم ... ليه بعض المسلمين .. ما يتركوا شئ للمسلمين
بالله عليك .. السنا خيرا من بعضكم ؟؟؟
اجمعي لعيالك
عيالي أعلمهم الطيران .. أعلمهم كيف يأكلوا .. لكن ... ما اجمع لهم أكثر من كفايتهم .. ما أشيل الحبوب المنثوره لكل الحمام
أنا أخاف من ربي .. ماني مثل بعض البشر .. أخاف أتحاسب عن باقي الحمام
طيب .. يا حمامه .. اجمعي لهم و لو ... من باب إنهم يرتاحوا من بعدك
سبحان الله في طبع البشر .. مافي احد ما يتعب
يا ترنيمة حب ( لقد خلقنا الإنسان في كبد ) .. كيف تبغي لهم الراحة .. كيف تطلبى لنفسك الراحه قبل ما تحطى رجلك في الجنة ؟؟؟
نفسي اسألك سؤال بس مستحيه
اتفضلى
ارجوك ... لا تعتبريه سخريه او معايبة على خلق الله
ما اعتقد إنك انتى إلي تعايبى على خلق الله يا ترنيمة حب ولا تسخرى من أحد .. وانت عارفه إن أكرمكم عند الله أتقاكم
ما تمنيتى يوم إنك تغيري هذا اللون الرمادي .. ما تمنيتى إن يكون لك الوان زاهية .. تفتخري بيها على باقي الحمام .. ما جريتىى يوم خلف المظاهر ؟؟؟
والله عيب عليك تسأليني هذا السؤال .. تقدرى تغيرى ملابسك
كيف يعني
يعني لو جا احد المسلمين للعمره..وكان لابس ثوب ... والا حتى بنطلون
ما ينفع .. ولو كان حتى لابس بدله أرماني ... لازم إحرام
.. أنا كذا مثلهم .. ريشي ولوني دليل هويتي .. فخري وإعتزازي .. والمسلم إحرامه دليل هويته هنا .. أول ما اشوفه أعرف إنه مسلم .. إنه جاء يبغى رب البيت
أول ما أشوف المسلمة وحجابها وعبايتها .. اعرف إنها ملتزمة وتخاف ربها وتحفظ عرض أبوها
إسلامك يبان عليكى في ملابسك .. في كلامك .. في معاملاتك .. في كل شئ .. انا ريشي ومكاني هم هويتي .. لكن انتى كل حياتك ... هي هويتك
أنا يوم القيامة ابعث بريشي وأكلي إلي اكلته في الساحه وخايفه من الحساب .. وانتى بكل حياتك وما فيها ايضا
لا تفهميني غلط ياحمامه .. انا قصدي من باب التغيير والزينة
صدقيني أنا أجمل مما تتخيلى .. تبغيني اتشبه بحمام ... غير حمام الحرم !!!
افرضى إني سويت مثل بعض البشر
لبست ثوب غيري .. تكلمت بكلام غيري .. خلعت ثوبي وثوب اهلي
افرضى إني جيت بكره بريش وردي
صدقبني مهما كنت حلوه .. ما حاكون مثل باقي الحمام
حاكون غريبة ولو كنت بين ربعي واهلي
حاطيح من عيون كل الحمام .. ولو كنت احلاهم في عين نفسي ... حتى إنتى ... رغم حنانك على الحمام .. حتسألى .. إيش وقف هذه الحمامه الغريبة بين حمام الحرم .. يمكن حتى ترفضى تأكليني .. تقولى حمام الحرم أولى
والله كلامك صحيح ... ولو إنه من حمامه
أحس من كلامك إن بعض المسلمين يتنكروا لإسلامهم .. ممكن يتشبهوا بالكفار .. بملابسهم .. بكلامهم .. بأفعالهم
هل عندكم هذا الكلام !!!!
علميني ... علميني أنا ما أخرج من الساحه ... ولا أروح اسواق ... ولا اشوف قنوات
بغيت أقول إيوه لكن خفت .. تتشمت بي الحمامه .. خفت أكذب ... خاصة إني في ساحة الحرم .. رحت سكت ... سويت نفسي مشغوله بالنظر للبيت الحرام
قلت لها عشان أخرج بعيد عن الموضوع
صراحه عجبني كلامك .. ايش رايك ترجعي معي لجده .. ولك علي اتكفل بكل شئ .. أكلك وشربك
اعوذ بالله
ليش تتعوذي بالله مني .. شايفتني بخيله ؟؟؟
الحين .. أنا متوكله على الله في كل شئ .. تبغيني اتوكل عليك !!!
حاتعب .. حامرض .. حاصير مثلكم
مين قال هذا الكلام ياحمامه .. حتأكلي أجمل أكل ... وراح أأكلك بيدي ... وأحطك في قفص من ذهب
لو رحت معاكى .. بانشغل بك .. متى تيجين .. متى تأكليني .. متى تشربيني .. متى تخليني اشوف الشمس
هذا مكاني .. هنا اذكر الله واسبح .. كيف أعرض عنه لجل هدف ثاني .. كيف ؟؟؟
( ومن أعرض عن ذكري فإن له معيشة ضنكا )
آسفه .. شوفى لك حمامه ثانية .. حمامه تشتهي الذهب .. تقضي عمرها تحلم وتحلم .. لكن ... لا تنسى تقصى لها ريشها .. طالما هي سجينة .. ولو كانت في قفص من ذهب .. ولو كانت سجينة أحلامها ... حيبقى الناس يقولوا .. ما أجمل القفص .. مسكينة الحمامه .. خلوها تطير
الحين انتى من الصبح تسأليني .. ودي أسألك سؤال واحد
اسألي .. وأيش تبغين تعرفين .. عنواني .. والا أحلامي
لا .. باسألك عن دمعة في عيونك
غريبة .. كنت أظنها خافية على الناس
اضحك الله سنك يا ترنيمة حب .. وهل أنا .. ناس .. أنا حمامه
تعبت والله يا رمادية الريش .. العمر يجرى .. والرحلة طويلة .. والزاد قليل .. والأماني عظيمه ...
.. والقبر يخوف ... والحساب شديد .. والجنة غاليه .. والنار تقول هل من مزيد .. والرب فعال لما يريد ... وكل ما أقول أديت إللي علي .. اكتشف إني لسه بعيييييد ه.. والفتن .. كل يوم تزيد
ما بين خوفي على نفسي وخوفي على الناس .. لابد من دمعة هنا ... ودمعة هناك .. دمعة على نفسي .. ودمعة عليهم
قالت : اسمعيني ... كل يوم أشوف حمام يجي .. وحمام يروح .. وحمام يموت .. لين صارت عندنا قناعة .. هي قناعة عند كل الحمام
قولي ياحمامه
شوفى يا حزينة القلب .. نحن بني الحمام الرمادي .. أعزنا الله بجواره فلا نبيع جواره أبدا .. ولو تحطيني في قفص ذهب .. وأنتم بني الإسلام .. لو ابتغيتم العزة بغير دينكم ... ليذلكم الله لكل خلقه .. ثم لا تجدوا من دونه وليا ولا نصيرا
سلمى على أمة محمد
بلغيهم إن حمام الحرم مشتاق لهم
الحرم مشتاق لهم
الكعبة مشتاقة لهم
خليهم يتوجهوا لها .. ولو .. بقلوبهم وقت الصلاة
بلغيهم إن ربهم غفور رحيم .. مشتاق لتوبة العصاة منهم
ما بين واسع رحمته .. وعظيم عزته .. فليستغفروا
اسأليهم
أما آن للبعض منهم أن يعود ... أما آن بعد
ألم يعلموا أنه ليس لهم إلا الله
علميهم إن كل شئ في الدنيا يحن لذكر الله .. حتى الحجر
مالهم غيره في الدنيا والآخرة
علميهم إننا مثل بعض الدعاة
بعضنا عليهم ينوح
ثم اقرأى عليهم
( ألم يأن للذين أمنوا أن تخشع قلوبهم لذكر الله )
( ألم يأن للذين أمنوا أن تخشع قلوبهم لذكر الله )
( ألم يأن للذين أمنوا أن تخشع قلوبهم لذكر الله )
اشوفك على خير .. الآن يرفعوا الآذان
ينادوا حي على الصلاة
حي الفلاح
وأحب ارفرف وقتها حول المآذن
*** | |
|
